68 da jirka reer Pakistan ee mar loo yaqaanay libaaxi Punjaab, wuxuu ahaa nin aad
qani u ah isla markaasna hormuud u ahaa ganacsiga dhanka warshada ee dalka
Pakistan. Waxaa intaa usii dheerayd inuu ahaa siyaasi aan la loodin karin.
Wuxuu soo noqday Ra’iisal Wasaaraha dalka Pakistan laba jeer oo hore balse
waxaa dhiciseeyey hamigiisa siyaasadeed talaabooyin uu dhanka khaldan u qaaday
iyo eedaymo musuqmaasuq, kuwaas oo galaafay xilkiisii Ra’iisal Wasaaranimo.
Markii 1aad ee uu xilka RW nimo qabto waxay ahayd 1990, waxaase lagu eedeeyey musuqmaasuq
ay qoyskiisu galeen, kaas oo uu xilkiisii ku waayey.
Waxaa mar labaad xilka RW loo doortay sanadkii
1997, isagoo waqtigaas amray in la tijaabiyo qumbuliyadda wax gumaada ee
nuclearka, taas oo loo bixiyey qumbuladii Islaamka isla markaasna Pakistan ku
soo biirisay dalalka haysta hubka khatarta ah.
1997 waxay fooda is dareen Gudoomiyihii
Maxkamadda Sare (Chief Justice) Shah, ka gadaal markii maxkamadda Sare ay isku
dayday in ay dhagaystato dacwad ku aadanaynyd wax ka bedel lagu sameeyey
dastuurka dalkaas taasoo uu hormuud ka ahaa Mr Sharif. Madaxweynihii
wadanka oo la oran jiray Farooq Leghari,
ayaa arrinta soo dhexgalay asaga oo dhinaca saaray Mr Shah balse RW sharif
wuxuu ku khasbay labadoodiiba in ay is casilaan asaga oo ka fa’iidaysanaya
aqlabiyaddii xoogganayd ee uu Baarlamaanka ku lahaa.
Sidoo kale RW Sharif wuxuu legday xilkiina ka
qaaday taliyhii ciidanka Gen Jehangir Karamat asaga oo ku bedelay Gen Pervesh
Musharraf.
Nasiib darro, RW Sharif waxay mar kale fooda is
dareen Gen Musharraf oo asagu soo xushay isaga oo maanka ku hayey inuu noqon
doono wiilkii uu barbaarsaday. Dagaal hoosaad muddo bilo ah socday ka dib,
Sharif wuxuu xilkii ka qaaday Gen
Musharraf oo ahaa taliyaha guud ee ciidamada Pakistaan wuxuuna amray diyaarad shacab
oo ay lahayd PIA numberkeeduna ahaa PIA flight PK 805 oo ka soo duushay dalka Sri
Lanka kuna jeeday dalka Pakistaan, ayna saarnaayeen ugu yaraan 190 qof oo uu ku jiray Gen Musharraf kuwaas oo u badna
dadshacab ah iyo arday in loo diido inay soo cagadhigato meel ka mida dalka
Pakistaan. Waa markii ugu horeeysay taariikhda ee RW dal, asaga oo dhulka jooga,
uu afduubo diyaarad laga leeyahay dalkiisa ayna saaranyhiin Shacabkiisii iyo
taliyihiisii ciidanka.
Arrinta xiisaha leh ee uu Gen Musharraf ku qoray
bookgiisa “In the Line of Fire” waxay
ahayd markii ciidamada Pakistan ay diyaariyeen isla markaasna fuliyeen inqilaab
military kuna amreen diyaaraddii siday Gen Musharraf inay soo cagadhigato
magaaalada Karachi ee dalka Pakistan.
Sharif waa la xiray, la maxkamadeeyey laguna
xukumay 14 sano oo xabsi ah, waxaase arrinta soo dhexgalay dowladda Sacudiga oo
ku qancisay Gen Musharaf, inuu Shariif u ogolaado inuu dalka sacuudiga si
masaafurisa ugu noolaado.
Shariif, waxuu ku soo laabtay dalka Pakistan
2007, asaga oo ka qayb qaatay doorashadii markaa socogay, balse xisbigiisu
wuxuu galay kaalinta 2aad. Shan sano ka dib, ayaa mar 3aad Sharif loo doortay
RW wuxuuna xilkaas hayey ilaa iyo maanta 28/07/2017 oo ay maxkamadda sare ku
dhawaaqday xukun ah inuusan jago siyaasadeed dalka ka qaban karin. Mr Shariif
ma dhumin kaliya inuu sii ahaado RW balse wuxuu dhuminaya inuusan xildhibaan
sii ahaan karin iyo inuusan sii hogaamin karin xisbigiisa PMLN.
Mohamed Baldho.
